जेठ २५, बिहिबार
आकाश राजभण्डारी वीरगञ्ज ।
वीरगञ्ज महानगरले निःशुल्क पानीट्याङ्की धारा जडान गर्ने भएको छ । वर्षा नहुँदा र बढ्दो गर्मीका कारण सतहको पानी सुक्दा चाँपकल लगायतमा पानी आउन छोडेपछि महानगरले पानीको आभावलाई मध्यनजर गर्दै निःशुल्क पानीट्याङ्की धारा जडान गर्न लागेको हो ।
अहिले महानगरसहित तराई–मधेशका विभिन्न जिल्लामा चाँपा कलको पानी आउन छाडेको गुनासो आउन थालेको छ । मोटरले समेत पानी नतान्दा शहरी जीवन निकै प्रभावित बनेको छ । सोही समस्यालाई समाधान गर्न महानगरले निःशुल्क पानीट्याङ्की धारा जडान गर्दै छ ।
नगरप्रमुख (मेयर) राजेशमान सिंहले आज बिहानै सामाजिक सञ्जाल मार्फत निःशुल्क धारा जडानका लागि वडा अध्यक्षहरुसँग सम्पर्क गर्न अनुरोध गरेका छन् । मेयर सिंहले वीरगञ्ज महानगर पालिकाले वडा नम्बर १ देखि १७ र १९ मा नेपाल खानेपानी संस्थानसँग समन्वय गरेर ४ हजार घरधुरीमा निःशुल्क सरकारी धारा (खानेपानी संस्थान) बाट जडान गर्ने भएकोले वडावासीले सम्बन्धित वडाका वडाअध्यक्षसँग सम्पर्क गरी आफ्नो घरमा निःशुल्क धारा जडान गर्न अनुरोध गरेका छन् ।
चापाकलहरुमा पानी आउन छाडेपछि अहिले सरकारी धारा जडान गर्न आउने ग्राहकहरुको संख्या पनि बढेको खानेपानी संस्थान वीरगञ्ज शाखाका प्रमुख इञ्जिनियर निरन महर्जनले बताए । पहिले सरकारी धारा जडान गर्न नमान्ने र पानी प्रयोग नगर्ने ग्राहकहरु अहिले दिनहुँ १० देखि १२ जनासम्म धारा जडानका लागि निवेदन दिन आउने गरेको प्रमुख महर्जनले बताए ।