२ जेठ २०७९, सोमवार
(नेपाली समय)
२ जेठ २०७९, सोमवार
नेपाली समय

देशकै दोस्रो ठूलो बुद्ध मूर्ति हेटौंडामा अनावरण

हेटौडा : हेटौडा उपमहानगरपालिका १८ स्थित गुम्बाडाँडामा देशकै दोस्रो ठूलो ढुङ्गाको बुद्धको मूर्ति अनावरण गरिएको छ । देशकै ठूलो ढुंगाको बुद्ध मूर्ति मुक्तिनाथमा रहेको छ । एक करोड ४४ लाख रुपैयाँ खर्चेर २५ फीट अग्लो बुद्ध मूर्ति तथा बोधी चैत्य (स्तुपा) निर्माण गरिएको हो । 

काठमाडौं ६ बौद्ध निवासी समाजसेवी दुर्गामान शाक्य, सुभाषराज शाक्य, सूर्यबज्र लामा, सान्तराम शाक्य, किरणरत्न शाक्य, राजेश्वरी श्रेष्ठ, हेटौंडाका समाजसेवी कमलचन्द्र सुमनलगायतको सक्रियतामा बुद्ध मूर्ति निर्माण गरिएको हो । बौद्ध धर्मगुरु लोमसाङ नाङ्गेलले एक समारोहका बीच मूर्ति अनावरण गरे । 

उक्त मूर्ति निर्माणमा सरकारी रकम लगानी भएको छैन । ‘सामाजिक र धार्मिक व्यक्तिहरुबाट सहयोग उठाएर मूर्ति बनाइएको हो,’ मूर्ति निर्माण अभियानमा सक्रिय कमलचन्द्र सुमनले भने, ‘तीन वर्ष लगाएर मूर्ति निर्माण गरिएको हो ।’ उनका अनुसार यो बागमती प्रदेशको सबैभन्दा अग्लो ढुंगाको बुद्ध मूर्ति हो । धार्मिक महत्वको मूर्ति अनावरण हुँदा वडा नम्बर १८ गुम्बाडाँडामा धार्मिक पर्यटन बढ्ने वडा अध्यक्ष अनिल बानियाँले बताए ।

साभार : अन्नपुर्णपोष्ट अनलाइन